काभ्रे । सहभागिता, पारदर्शिता र जवाफदेहिताका लागि आयोजना गरिएको सार्वजनिक सुनुवाई कार्यक्रममा अध्यक्ष भगवान अधिकारीले सामुदायिक वनमा झाडी फडानी गरी फलफूलका विरुवा र जडिबुटि रोप्ने कार्यलाई अगाडि बढाइने जानकारी दिनुभएको छ । शिक्षा, स्वास्थ्य, रोजगार, पर्यटन, कृषि, युवा लक्षित कार्यक्रमलाई विशेष जोड दिदैं बेथानचोक गाउँपालिकालाई एग्रो टुरिजम हब बनाएरै छाड्ने लक्ष्य रहेको गाउँपालिका अध्यक्ष भगवान् अधिकारीले प्रतिबद्धता व्यक्त गर्नुभएको छ ।

दिगो विकास लक्ष्य प्राप्तिका लागि जनप्रतिनिधिहरु एकजुट भएर लागीपर्ने उहाँँको प्रतिवद्धता छ । विभिन्न चुनौतिका बाबजुद पालिकाको आफ्नै प्रशासकिय भवन बनाउन प्रयासरत रहेको भन्दै उहाँले यसका लागि आम नागरिकको साथ र समर्थन आवश्यक रहेको बताउनुभएको छ । सार्वजनिक सुनुवाईमा उपाध्यक्ष तारा राना तिमल्सिनाले स्वागत मन्तव्य सहित पालिकाको गतिविधिका बारेमा जानकारी दिनुभएको छ । प्रमुख प्रशासकिय अधिकृत टेक बहादुर बुढथापाले आ.व २०८०÷०८१ को कात्र्तिक २० गते सम्म १४ करोड ५४ लाख ३५ हजार ९ सय २१ बजेट निकासा भएकोमा १२ करोड ६९ लाख ३ सय ५५ रुपैंया खर्च भएको जानकारी दिनुभएको छ । विभिन्न शाखाहरुको प्रगति प्रतिवेदन प्रस्तुत गर्दै उहाँले स्थानिय तहले पाएको २२ वटा अधिकार अनुसार नै नागरिकको माग अनुसार काम गरिरहेको बताउनुभएको छ ।
पालिकाले सञ्चालन गरेको विकास निर्माणका कार्यक्रमहरु, सेवा सुविधा, पारदर्शिता, सुशासन र जनसरोकारका विषयहरु माथि उपस्थित गाउँपालिका वासीहरुले जनप्रतिनिधिहरुलाई खबरदारी गर्दै सल्लाह सुझाव सहितको आ–आफ्नो भनाई राख्नुभएको छ । सम्बन्धित शाखा प्रमुखहरुले नागरिकले उठाएका समस्या तथा खबरदारीलाई पालिकाले गरेका प्रयास र कार्यान्वयनका विषयमा स्पष्ट पार्नुभएको छ । कार्यक्रममा ६ वटै वडाका वडाअध्यक्षहरु, कार्यपालिका सदस्यहरु, राजनैतिक दलका प्रमुख एवं प्रतिनिधिहरु, गाउँपालिकावासीहरु, पत्रकारहरु लगायत विभिन्न संघ संस्थाका प्रमुख एवं प्रतिनिधिहरुको उल्लेख्य सहभागिता रहेको छ ।
बेथानचोक गाउँपालिकाको आ.व २०७९÷०८० तथा २०८०÷०८१ को असोज मसान्त सम्मको सार्वजनिक सुनुवाई कार्यक्रम गाउँपालिकाको प्राङ्गणमा सोमबार सम्पन्न गरेको छ ।