काठमाडौं । नेपाललाई हराउँदै बंगलादेशले साफ यू–१९ महिला च्याम्पियनसिपको उपाधि जितेको छ ।

बंगलादेशको ढाकास्थित किंग्स एरेनामा आफ्नो घरेलु मैदानको फाइदा उठाउँदै बंगलादेशले नेपाललाई ४–० गोलअन्तरले हराउँदै उपाधि जितेको हो ।

सागोरिकाको एकपछि अर्को आक्रमण रोक्न नसक्दा नेपाल बंगलादेशसामु फितलो देखिएको थियो । सिनियर टिमबाट पनि खेल्दै आएकी सागोरिका एक्लैले गरेको ४ गोलको मद्दतले बंगलादेश पाँचौंपटक साफ यू–१९ उपाधि हात पार्न सफल भयो । नेपाल भने लगातार उपविजेतामै सीमित बन्न पुग्यो ।

अघिल्लो खेलमा बंगलादेशसँग ३–२ को गोलअन्तरले हार व्यहोरेको नेपालका लागि जितले मात्र उपाधि दिलाउने हुँदा केही बढी दबाब नेपालमाथि रहेको थियो । खेलको सुरुवातदेखि नै बंगलादेश नेपालमाथि हाबी बन्दै आयो । बंगलादेशका खेलाडीहरू नेपाली डिफेन्स र गोलकिपरमाथि हाबी भएका थिए । बंगलादेशसँगको पहिलो खेलको तुलनामा सोमबार नेपालले खासै राम्रो प्रभाव देखाउन सकेन । फलस्वरूप बंगलादेशको जितमा सागोरिका एक्लैले ४ गोल गरिन् । खेलको आठौं मिनेटमा सागोरिकाले गोल गर्दै बंगलादेशलाई पहिलो अग्रता दिलाएकी थिइन् ।

July 22, 2025, Jyotishsanchar press