काठमाडौँ । सिन्धुपाल्चोककी गंगा सोनामले गायन रियालिटी शो नेपाल आइडलकाे छैटौँ सिजनकाे उपाधि जितेकी छिन् ।
गए राति सम्पन्न ग्राण्ड फिनालेमा उनले अन्य चार प्रतिस्पर्धीलाई पछि पार्दै उपाधि जितेकी हुन् । सिन्धुपाल्चोककाे इन्द्रावती गाउँपालिका–१०, बडहरेकी २० वर्षीया गंगा सोनामकाे प्रस्तुति शुरुदेखि नै राेचक हुँदै आएकाे थियाे ।
नेपाल आइडलको अडिसनमा उनले पहिलाे देउडा गीत ‘डोली चढाई लैजान्या हो सुवा’ गाएर निर्णायकहरूको मन जितेकी थिइन् । त्यसयता उनले आफ्नाे प्रस्तुति सुधार गर्दै विजेता बन्न सफल भइन् ।
अन्तिम प्रतिश्पर्धामा गंगासहित दर्शना गान्धारी, अभिनय खाती, मृनल मानन्धर र बबिता थापामगर थिए । विजेता गंगाले २५ लाख रुपैयाँ पाएकी छिन् । यस कार्यक्रमकाे निर्णायकमा न्ह्यु बज्राचार्य, कालीप्रसाद बाँस्कोटा र इन्दिरा जोशी रहेका थिए।
September 1, 2025, Jyotishsanchar press
