April 15, 2025, Jyotishsanchar press
त्रिभुवन विश्वविद्यालयको ट्रान्सक्रिप्ट र प्रोभिजनल प्रमाणपत्रका लागि अब परीक्षा नियन्त्रण कार्यालयमा भौतिकरुपमा उपस्थित हुनैपर्ने बाध्यता हटेको छ। शिक्षा, विज्ञान तथा प्रविधि मन्त्री विद्या भट्टराई अनुसार आजदेखि अनलाइन सेवा सुरु भएको जानकारी दिएकी छिन्।
‘आज २०८२ वैशाख २ गते बिहान ११ बजेदेखि त्रिभुवन विश्वविद्यालयले ट्रान्सक्रिप्ट र प्रोभिजनल प्रमाणपत्रका लागि अनलाइनबाट आवेदन सञ्चालन गरेको छ,’ उनको सचिवालयले जारी गरेको सूचनामा भनिएको छ, ‘हालका लागि भुक्तानी कनेक्ट आइपीएसबाट गर्न सकिनेछ र क्रमशः अन्य भुक्तानी गेटवेहरू समेत समावेश गर्दै जाने जानकारी त्रिभुवन विश्वविद्यालयले दिएको छ।’
त्रिभुवन विश्वविद्यालयले यसअघि २०८० माघ १५ देखि प्रमाणपत्रको फाराम अनलाइनबाट भर्न मिल्ने सुविधा सुरु गरेको थियो। तर, अनलाइन सेवा सार्वजनिक भएको भोलिपल्टै वेबसाइट ह्याक भएपछि उक्त सेवा अवरुद्ध भएको थियो।
