टेलिकमका ७० हजार वटा रिचार्ज कार्ड चोरी

काठमाडौं । जेनजी आन्दोलनका क्रममा गण्डकी प्रदेशको पाेखरा महेन्द्रपुलस्थित नेपाल दूरसञ्चार कम्पनीको प्रदेश निर्देशनालय भवनमा तोडफोड तथा आगजनी हुँदा ठूलो संख्यामा रिचार्ज कार्ड चोरी भएको पाइएको छ ।

नेपाल टेलिकमले आइतबार आपतकालीन सूचना जारी गर्दै ती कार्ड प्रयोग नगर्न सबै उपभोक्तालाई आग्रह गरेको हाे। कम्पनीले जनाए अनुसार, चोरी भएका कार्डमध्ये सय रुपैयाँ मूल्यका ७० हजार र पाँच सय रुपैयाँ मूल्यका करिब दुई सय कार्ड रहेका छन् । ती कार्डका श्रेणी नम्बरसमेत टेलिकमले सार्वजनिक गरेको छ ।

सूचनामा भनिएको छ, “उक्त श्रेणी नम्बरभित्रका सबै कार्ड चोरी भएकाले प्रयोग नगर्नुहुन अनुरोध गरिन्छ । प्रयोगमा ल्याइएका कार्डले सेवामा समस्या उत्पन्न गराउन सक्छन् ।” साथै, त्यस्ता कार्ड भेटेमा नजिकैको दूरसञ्चार कार्यालय वा प्रहरी कार्यालयमा बुझाउन आग्रह गरेको छ।