मण्डन र बनेपा अस्पतालले पाए प्रथम सेवा विन्दुकाे स्विकृती

बनेपा । स्वास्थ्य बीमा कार्यक्रम अन्तर्गतको सेवा प्रदान गर्न काभ्रेपलाञ्चोक जिल्लाका दुई आधारभूत अस्पतालले स्वीकृति पाएका छन् ।

बनेपा नगरपालिकाले सञ्चालन गरेको बनेपा आधारभूत अस्पताल नाला र मण्डनदेउपुरले सञ्चालनमा ल्याएको आधारभूत अस्पताल स्वास्थ्य बीमा बोर्डमा आवद्ध भएका हुन् ।

बीमा बोर्डमा भएको कार्यक्रममा दुवै अस्पतालले सम्झौता गरेसँगै स्वास्थ्य बीमाको प्रथम सेवा विन्दु सञ्चालन गर्न स्वीकृति पाएका हुन्।

मण्डनदेउपुर आधारभूत अस्पताल ५ वेडको हो । स्वास्थ्य वीमा कार्यक्रम सम्झौताका लागि नगरप्रमुख टोकबहादुर वाईवा, उपप्रमुख विष्णुमणि नेपाल, वडा नम्बर १० का वडा अध्यक्ष कुमार लामा र अस्पतालका डा. सुरज श्रेष्ठ पुग्नु भएको थियो।

सम्झौता पत्रमा नगरपालिकाको तर्फबाट नगरप्रमुख वाईवा र अस्पतालका डा. श्रेष्ठले हस्ताक्षर गर्नुभएको छ भने बीमा बोर्डका तर्फबाट कार्यकारी निर्देशक डा. रघुराज काफ्लेले हस्ताक्षर गर्नुभएको छ।

बनेपाको तर्फबाट प्रमुख प्रशासकीय अधिकृत पोषण लामिछाने र अस्पतालका डाक्टरले हस्ताक्षर गरेका छन् । यो सँगै जिल्लामा स्वास्थ्य बीमाको प्रथम सेवा बिन्दु सञ्चालनका लागि काभ्रेपलाञ्चोकमा अनुमति पाउने सरकारी स्वास्थ्य संस्थाको संख्या ७ पुगेको छ। यसअघि सुनथान, खोपासी, पाँचखाल र धुलिखेल प्राथमिक स्वास्थ्य केन्द्र र मेथिनकोट प्रादेशिक अस्पतालले स्वीकृति पाइसकेका छन् ।

स्वास्थ्य बीमाको प्रथम सेवा बिन्दु सरकारी स्वास्थ्य संस्था नै हुने नियम साउन १ गतेबाट लागु भएको हो।