काठमाडौँ । मध्यपूर्वमा तनाव बढ्दै जाँदा इरान र संयुक्त राज्य अमेरिकाबीच बिहीबार फेरि हवाई आक्रमण तथा मिसाइल प्रहार भएको बताइएको छ। कुवेत, बहराइनलगायत संवेदनशील क्षेत्रमा सुरक्षा सतर्कता बढाइएको छ भने अमेरिकी राष्ट्रपति डोनाल्ड ट्रम्पले इरानलाई वार्ता अवरुद्ध गरेको आरोप लगाउँदै कडा चेतावनी दिएका छन्।
अमेरिकी सेनाले दोस्रो चरणको हवाई आक्रमण सञ्चालन गरेपछि इरानले पनि प्रतिउत्तरस्वरूप मिसाइल प्रहार गरेको अन्तर्राष्ट्रिय सञ्चारमाध्यमहरूले जनाएका छन्। बहराइनस्थित अमेरिकी नौसेनाको पाँचौँ फ्लीट मुख्यालय आसपासको सुरक्षा अवस्थालाई लिएर विशेष चासो बढेको छ।
इरानका विभिन्न क्षेत्रमा भएका हवाई आक्रमण र त्यसपछिका प्रतिआक्रमणले क्षेत्रीय शान्ति प्रयासमा थप चुनौती थपेको छ। इरानले हर्मुज जलघाँटीमा आफ्नो रणनीतिक प्रभाव कायम राख्ने अडान दोहोर्याएको छ भने लेबनान र इजरायलसँग सम्बन्धित सुरक्षा घटनाक्रमले पनि तनाव बढाएको बताइएको छ।
अमेरिकी सेन्ट्रल कमान्डका अनुसार बिहीबार बिहान गरिएको हवाई आक्रमणमा सैन्य निगरानी, सञ्चार तथा हवाई रक्षा प्रणालीलाई निशाना बनाइएको थियो। आक्रमणपछिको क्षतिको विस्तृत विवरण भने सार्वजनिक गरिएको छैन।
यसबीच कुवेतले सुरक्षा कारण देखाउँदै आफ्नो हवाई क्षेत्र अस्थायी रूपमा बन्द गरेको छ। बहराइनमा पनि मिसाइल चेतावनी प्रणाली सक्रिय पारिएको छ र दुवै देशले हवाई रक्षा प्रणालीलाई उच्च सतर्कतामा राखेका छन्।
क्षेत्रीय तनाव निरन्तर बढिरहेकाले मध्यपूर्वमा सुरक्षा र कूटनीतिक अवस्थाप्रति अन्तर्राष्ट्रिय समुदायको चासो बढेको छ।
सम्बन्धित खवर
