काठमाडौँ । नेपाली कांग्रेसका सभापति गगन थापाले नागरिक अगुवा तथा पूर्वअर्थमन्त्री डा. देवेन्द्रराज पाण्डेको निधनप्रति गहिरो दुःख व्यक्त गर्दै राष्ट्रले एक प्रखर बौद्धिक व्यक्तित्व, नैतिक नेतृत्व र लोकतन्त्रका सजग पहरेदार गुमाएको बताएका छन्।
सामाजिक सञ्जालमार्फत श्रद्धाञ्जली व्यक्त गर्दै थापाले डा. पाण्डेले जीवनभर नागरिक स्वतन्त्रता, समानता, मानव अधिकार र लोकतान्त्रिक चेतनाको पक्षमा निर्भीकतापूर्वक आवाज उठाएको उल्लेख गरेका छन्। उनले नेपालको लोकतान्त्रिक आन्दोलनका महत्वपूर्ण चरणमा नागरिक तहबाट संघर्षको समन्वय गर्दै निरंकुशताविरुद्ध सशक्त भूमिका खेलेको र नयाँ पुस्तालाई निरन्तर प्रेरित गरेको बताएका छन्।
थापाले अर्थसचिव, अर्थमन्त्री, विकास चिन्तक तथा सुशासनका अभियन्ताका रूपमा डा. पाण्डेले नेपालको अर्थतन्त्र, सार्वजनिक प्रशासन र विकाससम्बन्धी बहसलाई नयाँ दृष्टि दिएको उल्लेख गरेका छन्। सार्वजनिक जीवनमा उनले देखाएको इमानदारी, पारदर्शिता र नैतिक साहस भावी पुस्ताका लागि अमूल्य विरासत बन्ने उनको भनाइ छ।
साथै, सामाजिक सद्भाव, समानता र राष्ट्रिय एकताको पक्षमा डा. पाण्डेले निर्वाह गरेको भूमिका विशेष स्मरणीय रहेको उल्लेख गर्दै थापाले उनले जगाएको नागरिक चेतना र बौद्धिक सम्पदाले भावी पुस्तालाई पनि मार्गदर्शन गरिरहने विश्वास व्यक्त गरेका छन्।
सभापति थापाले दिवंगत डा. पाण्डेप्रति भावपूर्ण श्रद्धाञ्जली अर्पण गर्दै शोकसन्तप्त परिवार, आफन्त तथा शुभेच्छुकप्रति गहिरो समवेदना व्यक्त गरेका छन्।
सम्बन्धित खवर
