काठमाडौँ । नेपाली कांग्रेसका महामन्त्री प्रदीप पौडेलले पार्टीभित्र रहेका आन्तरिक मतभेद र असन्तुष्टिहरूलाई राजनीतिक संवादमार्फत समाधान गर्न नेता तथा कार्यकर्तालाई अपिल गरेका छन्।
शुक्रबार अपिल जारी गर्दै पौडेलले पार्टीका विवाद लिएर अदालत जाने वा सडकमा पोखिने गतिविधिले लोकतन्त्र र पार्टी दुवैलाई कमजोर बनाउने बताएका छन्। उनले असन्तुष्ट सबै पक्षलाई पार्टीको केन्द्रीय कार्यालय सानेपा आएर छलफल गर्न तथा आन्तरिक लोकतन्त्रलाई सुदृढ बनाउन आग्रह गरेका छन्।
मुलुकको वर्तमान राजनीतिक अवस्थाप्रति चिन्ता व्यक्त गर्दै पौडेलले वर्तमान सरकारले जनअपेक्षाअनुसार काम गर्न नसकेको बताएका छन्। प्रचण्ड बहुमतको सरकार भए पनि सत्तामा रहेकाहरूका गतिविधिले मुलुकलाई अनिश्चयतर्फ लैजाने जोखिम रहेको उनको भनाइ छ।
पौडेलले वर्तमान सरकारलाई पर्याप्त खबरदारी नगरिए देशलाई फर्कनै नसक्ने अनिश्चयको दिशामा लैजाने खतरा रहेको बताएका छन्।
गत भदौ २३ र २४ गतेका घटनाक्रम तथा त्यसपछि विकसित परिस्थितिले मुलुक कठिन मोडमा पुगेको उल्लेख गर्दै उनले कांग्रेस कमजोर हुँदा लोकतन्त्रसमेत संकटमा पर्ने चेतावनी दिएका छन्।
उनले सबै मतभेदलाई थाँती राखेर पार्टीको मूल प्रवाहमा गोलबद्ध हुन आग्रह गर्दै ‘झगडिया वा रमिते’ भएर बस्दा देशले सही नेतृत्व पाउन नसक्ने बताएका छन्।
