स्वास्थ्य

काभ्रे । धुलिखेल अस्पतालले आफ्नो ३० औं स्थापना दिवस एक भव्य कार्यक्रमका बीच सम्पन्न गरेको छ । आइतबार वागमती प्रदेशका मुख्यमन्त्री इन्द्रबहादुर बानियाँको प्रमुख आतिथ्यतामा कार्यक्रम भएको थियो । धुलिखेल अस्पतालका निर्देशक डा. रामकण्ठ माकजुको अध्यक्षतामा भएको कार्यक्रममा उपस्थित सबैलाई अस्पतालका डा. आभा श्रेष्ठले स्वागत मन्तव्यद्वारा स्वागत गर्नुभएको थियो ।

सन् १९९६ मा स्थापना भएको अस्पताल ३० औं वर्षमा प्रवेश गरेको हो । यस अवसरमा अस्पतालका परिकल्पनाकारद्वय काठमाडौं विश्वविद्यालयका पूर्वउपकुलपति डा सुरेशराज शर्मा र धुलिखेलका पूर्वमेयर वेलप्रसाद श्रेष्ठलाई सम्मान पनि गरिएको थियो ।

कार्यक्रमको उद्घाटन गर्दै मुख्यमन्त्री बानियाँले धुलिखेल अस्पताललाई आफूले सक्ने सबै सहयोग गर्न तयार रहेको प्रतिबद्धता व्यक्त गर्दै यसका लागि आउने कानुनी झण्जटहरुलाई सहजीकरण गर्न तयार रहेको बताउनुभयो । उहाँले आगामी दुई महिनामा यसको सम्पूर्ण प्रक्रिया अघि बढाउने बताउँदै यो अस्पताललाई स्वास्थ्य विज्ञान प्रतिष्ठान र विश्वविद्यालयको रुपमा संचालन गराउन पहल गर्ने पनि बताउनुभयो ।

यस्तै वागमती प्रदेशका सामाजिक विकास मन्त्री कञ्चनचन्द्र बादेले धुलिखेल अस्पतालले नसोचेको प्रगति गरिरहेको भन्दै अस्पताल ३० वर्षको भइसक्दा निकै आरोहअवरोह पार गरेको आफूले पाएको बताउनुभयो । उहाँले प्रदेश सरकार नागरिकको स्वास्थ्यप्रति संवेदनशील रहेको उल्लेख गर्दै आफूले सक्ने सहयोगका लागि तयार रहेको बताउनुभयो ।

कार्यक्रममा अस्पतालका डा. बलराम मल्लले अस्पतालले विगतदेखि हालसम्म गरेका कामहरुका बारेमा जानकारी दिनुभयो । डा. राजेन्द्र कोजुले अस्पताललाई अहिलेको अवस्थामा ल्याउन धेरैको सहयोग उल्लेखनिय रहेको भन्दै सहयोगी सबैलाई धन्यवाद दिनुभयो । उहाँले सोचाईलाई व्यवहारमा उतार्न त्यतिबेलादेखि लाग्नेहरुको सूची लामो रहेको भन्दै नेपाल सरकार र अन्तर्राष्ट्रिय निकायबाट पनि ठूलो सहयोग पाइएको बताउनुभयो । उहाँले नेपालबाट मात्र नभएर विश्वका धेरै मुलुकबाट पनि बिरामी धुलिखेल अस्पतालमा आउने गरेको बताउँदै अस्पतालले कुनै पनि बिरामीको उपचारमा कमी नगरेको जानकारी दिनुभयो ।

कार्यक्रममा अस्पतालका डाक्टर विराजमान कर्माचार्यले अस्पतालले पछिल्ला वर्षहरुमा अनुसन्धान र प्रविधिमैत्री बनाउँदै सेवा विस्तार गरिरहेको बताउनुभयो । अस्पतालका निर्देशक डा. रामकण्ठ माकजुले सधैं सकारात्मक सोच राखेर अघि बढ्नुपर्नेमा जोड दिँदै समस्याहरुसँग नडराउन सबैलाई अनुरोध गर्नुभयो । उहाँले तीस वर्षपछि के हुन्छ भनेर अहिले नै चिन्ता गर्न नहुने बताउनुभयो । उहाँले तीस वर्ष अघिका विषय स्मरण गराउँदै अहिलेको अस्पतालसम्म आइपुग्दा यस्तो होला भनेर कसैले नसोचेको बताउनुभयो । उहाँले यसमा सबैले साथ र सहयोग गर्नुभएको र आगामी दिनमा पनि सहयोग रहने आशा व्यक्त गर्नुभयो । अस्पतालबाट विभिन्न मेडिकल विभागमा फलोसीप प्राप्त गरेर सफलता पाउनुहुने डाक्टरहरुलाई पनि सम्मान गरिएको थियो ।

December 29, 2025, Jyotishsanchar press

काभ्रेपलाञ्चोक । स्वास्थ्य बिमा कार्यक्रमअन्तर्गत अब काभ्रेपलाञ्चोकका आठ अस्पतालबाट प्रथम सेवा प्रदान गर्न थालिएको छ ।

आइतबारदेखि थप एक मण्डनदेउपुर नगरले सञ्चालनमा ल्याएको आधारभूत अस्पतालले सेवा थालनी गरेपछि जिल्लाबाट उक्त सेवा प्रदान गर्ने अस्पताल आठ पुगेको हो । उक्त अस्पतालले गत साउन अन्तिम साता स्वास्थ्य बिमा बोर्डमा आबद्ध भई प्रथम सेवा केन्द्रको स्वीकृति पाएको थियो । सेवाको बागमती प्रदेशका स्वास्थ्यमन्त्री किरण थापाले औपचारिक रुपमा प्रारम्भ गरेका हुन् ।

कार्यक्रममा नगरप्रमुख टोकबहादुर वाईबाले स्वास्थ्य बिमालाई प्रभावकारी ढङ्गले सञ्चालन गर्न नगरपालिकाले आवश्यक तयारी गरी आइतबारदेखि औपचारिक रुपमा सेवा सुरु गरेको बताए । उनका अनुसार नगरका ६५ प्रतिशत नागरिकले स्वास्थ्य बिमा गरेका छन् ।

यसअघि सुन्थान, खोपासी, पाँचखाल र धुलिखेल प्राथमिक स्वास्थ्य केन्द्र तथा बनेपा नगर अस्पताल र मेथिनकोट प्रादेशिक अस्पतालले स्वीकृत पाई सेवा प्रदान गर्दै आएका छन् । धुलिखेल नगरले भने आफ्नो स्वास्थ्य केन्द्र भवनको सेवालाई गत साउन २६ गतेदेखि धुलिखेल अस्पतालको परिसरबाट सेवा सुरु गरेको छ । यसअघि उक्त केन्द्रले भौतिक पूर्वाधार तथा जनशक्ति अभावको कारण देखाउँदै स्वास्थ्य बिमाको प्रथम सेवा विन्दु सेवा दिन आलटाल गरिरहेको थियो । नगरले धुलिखेल अस्पतालमा बिमा सेवा लिन आउनेलाई सजिलो होस् भनेर धुलिखेल अस्पताल परिसरको भवनबाटनै चिकित्सक, नर्स, औषधिसहित ‘रिफरल’ सेवा सुरु गरिएको जनाएको छ ।

गत साउन १ गतेदेखि सरकारले सरकारी स्वास्थ्य संस्था नै स्वास्थ्य बिमाको प्रथम सेवा विन्दु हुने नियम लागू गरेको थियो । विसं २०७६ मङ्सिर १ गतेदेखि प्रथम सेवा विन्दुको रुपमा सूचीकृत जिल्लाका चार स्वास्थ्य संस्थामध्ये मेथिनकोट अस्पताल र प्रास्वाके सुन्थान र खोपासीले मात्रै यसअघि सेवा दिँदै आएका थिए ।

December 8, 2025, Jyotishsanchar press

बनेपा । यस वर्ष काभ्रेमा हालसम्म ४६ जना डेंगु सङ्क्रमित देखा परेका छन्। गत आर्थिक वर्षमा यहाँ करिब ७०० जनामा सङ्क्रमण पुष्टि भएको थियो।

यो वर्ष साउन १ देखि कात्तिक ३० गतेसम्म ४६ जनामा सङ्क्रमण पुष्टि भएको हाे । जसमा धुलिखेलमा एक जना, बनेपामा १९ जना, पनौतीमा एक, पाँचखालमा ९, मण्डनदेउपुरमा १४ जनामा सङ्क्रमण देखिएको छ। गत वर्ष बनेपामा धेरै सङ्क्रमित देखिएकाेमा यस वर्ष पनि सबैभन्दा बढी सङ्क्रमण बनेपामै देखिएको छ।

यस्तै भुम्लुमा २ जना सङ्क्रमित भएका जिल्ला जनस्वास्थ्य कार्यालय काभ्रेले जनाएको छ। जसमा पुरुषको संख्या १९ र महिलाको संख्या २७ जना रहेको छ। नमाेबुद्ध, राेशी, खानीखाेला, तेमाल, बेथानचाेक, महाभारत र चाैरीदेउरालीमा भने कुनै पनि सङ्क्रमित भेटिएका छैनन् ।

November 16, 2025, Jyotishsanchar press

काठमाडौँ । आज विश्व मधुमेह दिवस नेपालसहित विश्वका विभिन्न देशमा मनाइँदैछ। विविध चेतनामूलक कार्यक्रमका साथ दिवस मनाउन थालिएकाे हाे। मधुमेहको जोखिम, रोकथाम र उपचारबारे चेतना फैलाउनु यो दिवसको उद्देश्य हो ।

संयुक्त राष्ट्र सङ्घको आह्वानमा सन् २००७ देखि याे दिवस मनाउन थालिएकाे हाे। मधुमेहको रोकथाम र उपचारका लागि आफ्ना स्वास्थ्य प्रणालीअनुसार राष्ट्रिय नीति निर्माण गर्न सबै सदस्य राष्ट्रलाई राष्ट्रसङ्घले प्रोत्साहन गर्दै आएको छ।

विश्व स्वास्थ्य सङ्गठनका अनुसार सन् २०१४ मा विश्वभर ४२ करोड २० लाख वयस्क मधुमेहबाट प्रभावित थिए । मधुमेह मोटोपना, अस्वस्थ जीवनशैली र शारीरिक गतिविधि कमीका कारण यो रोग बढ्दै गएको हो ।

November 14, 2025, Jyotishsanchar press

काभ्रे । काभ्रेकाे मण्डनदेउपुर नगरपालिका वडानम्बर-४ मा रहेकाे महाकाली माविमा आज भएकाे स्वास्थ्य शिविरमा ८१३ जना नागरिकले सेवा लिएका छन् ।

नगरपालिकाकाे वडानम्बर ४ काे आयाेजना र कान्छीमाया तामाङ मेमोरियल अस्पतालको सहयोग र समन्वयमा भएकाे शिविरमा ८१३ जना नागरिकले सेवा लिएका कान्छीमाया तामाङ फाउण्डेशनका अध्यक्ष दिलबहादुर थाेकर तामाङले जानकारी दिनुभयाे ।

Taiwan Root Medical Peace Corps team काे सहयोगमा संचालन भएकाे निःशुल्क स्वास्थ्य शिविरमा करिब ४० जना स्वास्थ्यकर्मी डाक्टरहरुले बिरामीकाे उपचार गरेका थिए ।
शिविरमा दन्तरोग सेवा, छाला तथा यौन रोग सेवा, आँखा जाँच सेवा, अकुपन्चर , स्त्रीरोग सेवा लगायत ९ प्रकारका स्वास्थ्य सेवाहरु उपलब्ध थियो ।

कार्तिक २३ गतेदेखि याे टाेलीले काभ्रेका पाँच वटा पालिकामा स्वास्थ्य शिविर संचालन गरिरहेकाे छ । आज अन्तिम दिन मण्डनदेउपुर नगरपालिका ४ मा रहेकाे महाकाली माविमा शिविर संचालन भएकाे हाे । यसअघि पाँचखालमा ७८०, बेथानचाेकमा ३५२, राेशीमा ५४७, धुलिखेलमा ७७९ र मण्डनदेउपुरमा ८१३ गरि ३ हजार २७१ जनाले सेवा लिएका अध्यक्ष थाेकरले जानकारी दिनुभयाे ।

November 13, 2025, Jyotishsanchar press

काभ्रे । धुलिखेलमा भएकाे स्वास्थ्य शिविरमा ७८३ जना नागरिकले सेवा लिएका छन् ।

नगरपालिकाकाे वडा नम्बर ८ काे आयाेजना र कान्छीमाया तामाङ मेमोरियल अस्पतालको सहयोग र समन्वयमा बडालगाउँमा रहेकाे बाल बिनायक विद्यालयमा आज भएकाे शिविरमा ७८३ जना नागरिकले सेवा लिएका वडानम्बर ८ का वडाध्यक्ष बिनाेद गाैतमले जानकारी दिनुभयाे ।

Taiwan Root Medical Peace Corps team काे सहयोगमा संचालन भएकाे निःशुल्क स्वास्थ्य शिविरमा करिव ४० जना स्वास्थ्यकर्मी डाक्टरहरुले बिरामीकाे उपचार गरेका थिए ।
शिविरमा दन्तरोग सेवा, छाला तथा यौन रोग सेवा, आँखा जाँच सेवा, अकुपन्चर , स्त्रीरोग सेवा लगायत ९ प्रकारका स्वास्थ्य सेवाहरु उपलब्ध थियो ।

कार्तिक २३ गतेदेखि याे टाेलीले काभ्रेका पाँच वटा पालिकामा स्वास्थ्य शिविर संचालन गरिरहेकाे छ । भाेलि कार्तिक २७ गते मण्डनदेउपुर नगरपालिका ४ मा रहेकाे महाकाली माविमा शिविर संचालन हुने कान्छीमाया तामाङ फाउण्डेशनका अध्यक्ष दिलबहादुर थाेकर तामाङले जानकारी दिनुभयाे ।

November 12, 2025, Jyotishsanchar press

धुलिखेल । साइकल कल्चर कम्युनिटीको आयोजना तथा धुलिखेल अस्पतालको सहकार्यमा आगामी पुस १७ गते (जनवरी १, २०२६) देखि पाँचथरको चिवाभञ्ज्याङदेखि बैतडीको झुलाघाटसम्म बृहत् साइकलयात्रा हुने भएको छ ।

बुधबार काभ्रेपलाञ्चाकको धुलिखेल अस्पतालमा आयोजित पत्रकार सम्मेलनमा यसको जानकारी दिइएको हो । आयोजकका अनुसार मध्यपहाडी लोकमार्ग हुँदै पूर्व–पश्चिम साइकलयात्रा हुनेछ । साइकलयात्रा अवधीभर एक हजार आठ सय किलोमिटर साइकलयात्रा हुने आयोजनाका संयोजक तारालाल श्रेष्ठले जानकारी दिनुभयो ।

साइकलयात्रामा ५२ हजार मिटर उचाई पूरा गर्ने अनुमान छ । सो यात्रामा मेचीदेखि महाकालीसम्मका साइकलयात्री सहभागी हुन सक्नेछन् । एक महिनासम्म चल्ने यात्रामा धुलिखेल अस्पतालको प्राविधिक सहयोगमा विभिन्न शहरहरूमा क्यान्सर र अन्य स्वास्थ्यसम्बन्धी सचेतनामूलक कार्यक्रमहरू पनि हुनेछन् ।

साइकलयात्रामा जोडिएका सहयोगीहरूबाट प्राप्त सहयोग क्यान्सर बिरामी सहयोग कोष स्थापनाका लागि धुलिखेल अस्पतालमा हस्तान्तरण गर्ने लक्ष्य रहेको कार्यक्रम संयोजक श्रेष्ठले जानकारी दिनुभयो । सिन्धुपाल्चोक जिल्लाको लिसंखुपाखरका हर्क लामाले यसको नेतृत्व गर्दैछन् । लामासँगै स्तन क्यान्सरको तेस्रो चरणलाई परास्त गर्दै सक्रिय जीवन जीउँदै आएकी कविता चित्रकार पनि सहभागी हुने आयोजकले जानकारी दिएको छ ।

कार्यक्रम एकदमै प्रभावकारी र सन्देशमूलक रहेको धुलिखेल अस्पतालका निर्देशक डा. रामकण्ठ माकजुले बताउनुभयो । सोही कार्यक्रममा धुलिखेल अस्पतालका डा. सुमनराज ताम्राकारले लेख्नु भएको पुस्तक “अर्बुद मन्थनः दीर्घ जीवन” को विमोचन पनि गरिएको थियो ।

October 29, 2025, Jyotishsanchar press

काठमाडौँ । यस वर्ष देशका ७५ जिल्लामा डेंगुका बिरामी फेला परेका छन्। डोल्पा र मनाङबाहेक सबै जिल्लामा डेंगुका बिरामी फेला परेका हुन्।

इपिडिमियोलोजी तथा रोग नियन्त्रण महाशाखा (ईडीसीडी)को पछिल्लाे तथ्यांक अनुसार देशभर
६ हजार ६६८ जनामा डेंगु संक्रमण पुष्टि भएको छ। जसमा पाँच जनाको मृत्यु भएको छ।

प्रदेशगतरुपमा हेर्दा सबैभन्दा बढी डेंगु संक्रमण बागमती प्रदेशमा पुष्टि भएको छ। यहाँ एक हजार ६४९ जनामा डेंगु पुष्टि भएको छ। यसअघिकाे तथ्यांकमा गण्डकी प्रदेशमा सबैभन्दा बढी संक्रमित रहेका थिए ।

दाेस्राेमा गण्डकी प्रदेशमा एक हजार ६३१ जनामा संक्रमण पुष्टि हुँदा लुम्बिनीमा एक हजार ११७ जना संक्रमित भेटिएका छन् ।

उता कोशी प्रदेशमा ८९६, सुदूरपश्चिम प्रदेशमा ७६२, कर्णाली प्रदेशमा ४७४ र मधेशमा १३९ जनामा डेंगु पुष्टि भएको छ।

October 27, 2025, Jyotishsanchar press

काठमाडौँ । यस वर्ष नेपालमा डेंगु संक्रमितको संख्या ६ हजार १ सय ९७ पुगेको छ। सबैभन्दा धेरै गण्डकी प्रदेशमा संक्रमित रहेका छन् । यहाँ १ हजार ५ सय ६२ जना संक्रमित रहेको तथ्यांक रहेकाे छ ।

इपिडिमियोलोजी तथा रोग नियन्त्रण महाशाखा इडिसिडीले सार्वजनिक गरेको तथ्यांक अनुसार पछिल्लो २४ घण्टामा देशभर ३७ जनामा डेंगु संक्रमण पुष्टी भएको छ।

यो साता बागमती प्रदेशमा सबैभन्दा धेरै १ सय २५ जनामा संक्रमण देखिएको इडिसिडीले जनाएको छ । त्यसपछि क्रमशः कर्णाली प्रदेशमा १ सय १ जनामा संक्रमण देखिएको छ भने सुदुरपश्चिममा ५९, लुम्बिनीमा ५८, गण्डकीमा ४९, कोशीमा २८ र मधेश प्रदेशमा ८ जना गरी ४ सय २८ नयाँ संक्रमति थपिएका छन् ।

October 16, 2025, Jyotishsanchar press

काभ्रेपलाञ्चोक। शीर मेमोरियल एड्भेन्टिस्ट अस्पतालले आमा सुरक्षा कार्यक्रम स्थगनको बारेमा ध्यानाकर्षण गराएको छ।

अस्पतालले एक विज्ञप्ति जारी गर्दै यसकाे विराेध गरेकाे हाे । विज्ञप्तिमा भनिएको छ– ‘२०१६ सालमा सेभेन्थ–डे एड्भेन्टिस्ट संस्थाद्वारा स्थापना गरिएको शीर मेमोरियल एड्भेन्टिस्ट अस्पतालद्वारा काभ्रेपलाञ्चोक, भक्तपुर, सिन्धुपाल्चोक, दोलखा, रामेछाप, ओखलढुंगा, सिन्धुली (पूर्व १ नं.) लगायत जिल्लाका जिल्लावासीहरूलाई सर्वसुलभ स्वास्थ्य सेवा विगत ६५ वर्षदेखि निरन्तररूपमा उपलब्ध गराउँदै आएको तथ्य यहाँहरू सबैलाई अवगत नै छ ।

त्यस क्रममा नेपाल सरकारको बजेट विनियोजन अन्तर्गत “बनेपा नगरपालिका र यस अस्पतालबीच लामो समयदेखि द्विपक्षीय सम्झौता भई आमा सुरक्षा कार्यक्रम सञ्चालन हुँदै आएकोमा”, आगामी आ.व. २०८२/८३ का लागि सो कार्यक्रममा संघीय सरकारबाट पर्याप्त बजेट विनियोजन नभएको र उक्त बजेटबाट कार्यक्रम सञ्चालन गर्न पर्याप्त नहुने देखिएकोले, स्रोत सुनिश्चित नहुन्जेलसम्म पूर्व सम्झौता अनुसारको आमा सुरक्षा कार्यक्रम मिति २०८२ कार्तिक १ गतेदेखि स्थगन गरिएको जानकारी बनेपा नगरपालिकाको मिति २०८२ असोज २७ गते, चलानी नं. ६२८ को पत्रद्वारा प्राप्त भएकोले सोही अनुरूप सो सेवा स्थगन गर्नुपर्ने बाध्यात्मक परिस्थिति सिर्जना भएको छ । अतः सो सेवासँग सम्बन्धित सम्पूर्ण सेवाग्राहीहरूमा यो जानकारी अनुरोधपूर्वक प्रस्तुत गरिन्छ ।’

डा. हेक्टर गायरस, एम.डी.
प्रमुख कार्यकारी अधिकृत

October 15, 2025, Jyotishsanchar press